سلیکان ویلی:
اسٹارٹ اپ کمپنی ’’یانک ٹیک‘‘ نے اسمارٹ فون اور ٹیبلٹ کے لیے وائرلیس چارجر تیار کرلیا ہے جسے ’’مدر باکس‘‘ کا نام دیا گیا ہے۔
چھوٹی گیند جیسے اس وائرلیس چارجر کو بجلی کے ساکٹ میں لگادیا جاتا ہے جس کے بعد یہ اپنے قریب موجود اسمارٹ فون یا ٹیبلٹ کو چارج کرسکتا ہے۔ البتہ اس سے چارج ہونے والی ڈیوائس کے لیے یو ایس بی چارجنگ پورٹ سے لیس ہونا ضروری ہوگا جو مدر باکس کے ساتھ ہی فراہم کی جائے گی۔
یہ کسی آلے کو 2 واٹ سے 10 واٹ تک کی شرح سے چارج کرسکے گا جس کا انحصار آلے اور چارجر کے درمیانی فاصلے پر ہوگا۔ مدر باکس سے اینڈروئیڈ اور آئی او ایس، دونوں آپریٹنگ سسٹمز والے اسمارٹ فونز اور ٹیبلٹ چارج کیے جاسکیں گے۔
مدر باکس کا قدرے چھوٹا ورژن بیٹری استعمال کرتا ہے جسے پاور پلگ میں لگانے کی ضرورت نہیں ہوتی البتہ چارجنگ ختم ہوجانے پر اسے بجلی کے ساکٹ میں لگاکر دوبارہ چارج کیا جاسکتا ہے۔
یانک ٹیک نے اپنے وائرلیس چارجر کے لیے کراؤڈ فنڈنگ کی مد میں 25 ہزار ڈالر سے زیادہ رقم جمع کرلی ہے اور اس کی پہلی کھیپ ستمبر 2017 تک مارکیٹ میں پیش کردی جائے گی۔ وہ صارفین جو مدر باکس خریدنے کے لیے پہلے بکنگ کروائیں گے انہیں یہ آلہ 79 ڈالر میں فروخت کیا جائے گا جب کہ اس کی حتمی قیمت کا اعلان آئندہ چند ماہ بعد متوقع ہے۔