کراچی:
انسانی خدمت کے جذبے سے سرشار بین الاقوامی سماجی شخصیت مرحوم عبدالستار ایدھی کی 89 ویں سالگرہ کے موقع پردنیا کے سب سے بڑے سرچ انجن گوگل نے ان کی خدمات کو خراج عقیدت پیش کرتے ہوئے اپنے صفحہ اول پر ان کا ڈوڈل جاری کیا ہے۔
دنیا بھر میں انسانیت کی خدمت کرنے والے مرحوم عبدالستار ایدھی کی 28 فروری کو89 ویں سالگرہ منائی جائے گی لیکن دنیا بھر میں بابائے انسانیت اور ان کے کاموں کو خراج عقیدت پیش کرنے کا سلسلہ آج سے ہی شروع ہوگیا ہے جس میں دنیا کا سب سے بڑا سرچ انجن گوگل بھی پیش پیش ہے۔
گوگل نے عبدالستار ایدھی کو ان کی خدمات کی بنا پر خراج عقیدت پیش کرنے کے لیے اپنے سرورق کو ہی تبدیل کردیا ہے اور صفحہ اول پر عبدالستار ایدھی کی تصویر اور فلاحی کاموں کو آویزاں کرکے ان کی سماجی خدمات کا اعتراف کیا ہے۔ گوگل آسٹریلیا سرچ انجن نے اپنا ہوم پیج تبدیل کرکے ایدھی صاحب کو خراج عقیدت پیش کرنے کا آغاز کردیا ہے جس کے بعد یہ سلسلہ پوری دنیا میں جاری رہے گا۔