کراچی:
کرپشن الزامات کے باعث پی آئی اے کے جبری رخصت پر بھجوائے گئے سی ای او برنڈ ہلڈن برانڈ کوچیف آپریٹنگ آفیسرکے عہدے سے بھی معطل کردیا گیا ہے۔
ایکسپریس نیوزکے مطابق پی آئی اے کے چیف ایگزیکٹو آفیسربرنڈ ہلڈن برانڈ کے خلاف ملائیشیا سے ویٹ لیزپرمہنگے داموں جہاز لینے سے متعلق کرپشن چارجزپرتحقیقات جاری ہیں، ایف آئی اے کی تحقیقات مکمل ہونے تک تمام اختیارات واپس لئے گئے ہیں، جس کے بعد اب ان سے سی او او(چیف آپریٹنگ آفیسر) کا چارج بھی واپس لے لیا گیا ہے۔ برنڈ ہلڈن برانڈ ای سی ایل میں نام ہونے کے باعث بیرون ملک سفر بھی نہیں کرسکتے ہیں جب کہ چیف فنانس آفیسرنیئرحیات کوبطورقائم مقام چیف ایگزیکٹو آفیسر کام جاری رکھنے کی ہدایت جاری کی گئی ہیں۔
واضح رہے کہ گزشتہ سال قومی ایئرلائن کے طیاروں کی لیزنگ میں بدعنوانی سامنے آنے کے بعد وزیرداخلہ چوہدری نثار نے پی آئی اے کے سی ای او کا نام ای سی ایل میں ڈال کر طیاروں کی لیز کے حوالے سے تفتیش کا حکم دیا تھا۔