اسلام آباد( بی ایل آٸی)صدر مملکت ڈاکٹر عارف علوی سے چین کے سفیر یاؤ جنگ نے ملاقات کی ہے۔ عارف علوی نے کہا کہ پاکستان اور چین کی دوستی ہر آزمائش پر پوری اتری ہے۔ دونوں ممالک کے تعلقات علاقائی امن و سلامتی کے ضامن ہیں۔

صدر مملکت ڈاکٹر عارف علوی نے چینی سفیر سے گفتگو کرتے ہوئے کہا کہ پاکستان اور چین کی دوستی ہر آزمائش پر پوری اتری ہے۔ پاکستان چین کے ساتھ اپنے تعلقات کو بڑی اہمیت دیتا ہے۔ دونوں ممالک کے تعلقات علاقائی امن و سلامتی کے ضامن ہیں۔

صدر مملکت نے کہا کہ چین پاکستان اقتصادی راہداری دونوں ممالک کے درمیان تعاون کی علامت ہے۔ سی پیک پاکستان اور چین کے درمیان دوطرفہ تعلقات کو مزید مضبوط بنانے میں اہم کردار ادا کرے گا جبکہ اس کی تکمیل سے پاکستان کو توانائی، صنعت اور انفراسٹرکچر کے شعبوں کی مکمل صلاحیت بروئے کار لانے میں مدد ملے گی۔

صدر مملکت نے کہا کہ چین ہمارے بنیادی قومی مفادات سے متعلق معاملات پر ہمیشہ پاکستان کے ساتھ کھڑا رہا ہے۔

انہوں نے بالخصوص کشمیر کے مسئلے پر پاکستان کی حمایت پر چین کو سراہا۔