وفاق ہمیں بھی سہولیات دے تو ہم بھی اورنج ٹرین بنا سکتے ہیں:مراد علی شاہ

حید رآباد

وزیراعلی سندھ مراد علی شاہ کا کہنا ہے کہ وفاقی حکومت نے پنجاب حکومت کو جو سہولیات دیں ،وہ سندھ کو بھی دے تو ہم بھی اورنج ٹرین بنا سکتے ہیں۔
حیدر آباد میں میڈیا سے گفتگو کرتے ہوئے وزیر اعلی سندھ مراد علی شاہ کا کہنا ہے کہ لاہور میں اورنج ٹرین بن رہی ہے یہ ایک اچھا اقدام ہے جس سے لاہور کے عوام کوفائدہ ہو گا،وفاق اگرہمیں بھی وہ تمام سہولیات دے تو ہم بھی صوبے میں اورنج ٹرین بنا سکتے ہیں۔مراد علی شاہ نے گلہ کیا کہ وفاقی وزیر خزانہ اسحاق ڈار تمام صوبوں میں مفاہمت پیدا کرنے میں ناکام رہے ،اگر فنڈز برابری کی سطح پر جاری ہوں تو کوئی شک نہیں کہ صوبے بھی یکساں ترقی کریں ۔
واضح رہے کہ وزیراعلی پنجاب شہباز شریف نے کل لاہور میں اورنج ٹرین منصوبے میں شامل ٹرین کی تقریب رونمائی کی ،منصوبے کا 75فی صد کام مکمل ہو چکا ہے اور جلد ہی سہولت عوام کے لئے دستیاب ہو گی۔