وزیراعظم اور آرمی چیف کا کور ہیڈکوارٹر پشاور کا دورہ

وزیراعظم عمران خان اور آرمی چیف جنرل قمر جاوید باجوہ نے کور ہیڈکوارٹر پشاور کا دورہ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق وزیراعظم عمران خان اورآرمی چیف جنرل قمر جاوید باجوہ نے کور ہیڈکوارٹر پشاور کا دورہ کیا جہاں وزیراعظم عمران خان کو موجودہ سیکیورٹی صورتحال پر تفصیلی بریفنگ دی گئی۔

آئی ایس پی آر کے مطابق کور ہیڈکوارٹر آمد پر وزیراعظم نے یادگار شہداء پر پھولوں کی چادر چڑھائی۔

آئی ایس پی آر کا کہنا تھا کہ بدلتے ہوئے سیکیورٹی ماحول میں پاک افغان بارڈر کی ممکنہ ہنگامی صورتحال سے نمٹنے کی منصوبہ بندی سے وزیراعظم کو آگاہ کیا گیا جبکہ جاری آپریشنز، پاک افغان بارڈر پر باڑ کی تنصیب، قبائلی اضلاع کی سماجی و معاشی ترقی کے منصوبوں پر بھی وزیراعظم کو بریفنگ دی گئی۔

آئی ایس پی آر کا یہ بھی کہنا تھا کہ وزیراعظم نے پاکستان کے موثر بارڈر مینجمنٹ نظام پر اطمینان کا اظہار کیا جبکہ موثر بارڈر کنٹرول اور داخلی سلامتی کے اقدامات پر بھی اطمینان کا اظہار کیا۔

آئی ایس پی آر کا مزید کہنا تھا کہ وزیراعظم نے قبائلی اضلاع میں سماجی و معاشی ترقی کے منصوبوں کے لیے سازگار ماحول فراہم کرنے پر سیکیورٹی فورسز کی تعریف کی۔

آئی ایس پی آر کے مطابق گورنر، وزیراعلیٰ خیبر پختونخواہ بھی وزیراعظم کے ساتھ تھے۔