لندن : برطانوی پولیس کا کہنا ہے کہ لندن حملے میں ملوث دہشت گردوں کی شناخت کا عمل مکمل ہونے کے قریب ہے، نام حملہ آوروں کے نام جاری کریں گے۔
غیرملکی خبر رساں ایجنسی کی جانب سے جاری رپورٹس کے مطابق برطانوی پولیس کا کہنا ہے کہ لندن حملہ آوروں کے نام جلد جاری کردیں گے، دوسری جانب حملوں کی ذمہ داری کالعدم داعش نے قبول کرلی،حملوں میں سات افراد ہلاک اور 48 زخمی ہوئے تھے۔
لندن برج حملے کے بعد برطانوی پولیس کی شر پسند عناصر اور دہشت گردوں کے خلاف کارروائیاں میں تیزی آگئی ہے، خفیہ اطلاعات پر کیے گئے آپریشن کے دوران بارکنگ کے علاقے سے بارہ مشتبہ افراد کو گرفتار کیا گیا ہے۔ پولیس کے مطابق یہ گرفتاریاں برج حملہ آوروں میں سے ایک کے فلیٹ پر چھاپے کے نتیجے میں عمل میں آئیں۔
برطانوی وزیر اعظم ٹیریزا مے کا کہنا ہے کہ دہشت گردوں کو شکست دینا بہت بڑا چیلنج ہے لیکن ہم انتہا پسندی اور دہشت گردی کی ذہنیت کو پنپنے نہیں دیں گے۔
حملوں میں مرنے والے اور زخمیوں سے اظہار یک جہتی کا سلسلہ بھی جاری ہے، لوگوں کی جانب سے بڑی تعداد میں مرنے والوں اور زخمیوں سے اظہار یکجتی کیلئے پھول رکھ کر خراج عقیدت پیش کیا گیا۔
مرنے والوں اور زخمیوں سے اظہار یکجتی اور دہشت گردوں کو واضح پیغام دینے کیلئے پاکستان اور بھارت کے میچ سے قبل ایک منٹ کی خاموشی بھی اختیار کی گئی، جب کہ اسپین کے دارالحکومت میڈرڈ میں چیمپئنز لیگ ٹائٹل جیتنے کی خوشی میں ایک تقریب کا اہتمام کیا گیا ۔ تقریب کے آغاز پر کلب کے تمام کھلاڑیوں اور آفیشیلز نے لندن دہشت گرد حملے میں ہلاک افراد کی یاد میں ایک منٹ کی خاموشی اختیار کی۔