کراچی (اسپورٹس رپورٹر)کراچی ہاکی ایسوسی ایشن کے زیراہتمام اولمپیئن حنیف خان و ڈاکٹر جنید علی شاہ اسپورٹس ہاکی کمپلیکس میں کھیلے جانے والے میئر کراچی گولڈ کپ انٹرڈسٹرکٹ ہاکی لیگ کا فائنل ڈسٹرکٹ سینٹرل نے ڈسٹرکٹ ویسٹ کو ایک کے مقابلے میں چار گول سے شکست دیکر ٹرافی پر اپنا قبضہ جمالیا۔ فاتح ٹیم کے شاہ زیب نے آخری کوارٹر کے پانچ منٹ میں دو گول بناکر اپنی ٹیم کی4-1 سے سرخرو کردیا۔ٹورنامنٹ کے بہترین کھلاڑی کا اعزاز ڈسٹرکٹ سینٹرل کے احتشام کو انعام کی صورت میں موٹر بائیک کا تحفہ دیا گیا، فاتح ٹیم کے کپتان ڈسٹرکٹ سینٹرل کے کپتان سابق اولمپئن 
عباس حیدر کو ٹرافی کے ساتھ دو لاکھ روپے کیش کا انعام دیا گیا، رنراپ ٹیم ڈسٹرکٹ ویسٹ کے کپتان عاصم کو ایک لاکھ روپے ٹرافی کے ہمراہ دیئے گئے۔ میئر کراچی گولڈ کپ انٹرڈسٹرکٹ ہاکی لیگ کی اختتامی تقریب میں مہمان خصوصی میئر کراچی وسیم اختر، صوبائی وزیر شہلا رضا، ڈاکٹر جنید علی شاہ،ڈی جی کے ڈی اے سمیع الدین صدیقی نے اور اولمپیئن حنیف خان کے ہمراہ کھلاڑیوں میں انعامات تقسیم کئے ۔ٹورنامنٹ کی شاندار کامیابی اور مختصر عرصے میں ہاکی کی خدمات کے اعتراف میں وسیم اختر نے کے ایچ اے کے سیکریٹری حیدر حسین کو تعریفی خط سے نوازا۔تفصیلات کے مطابق کراچی ہاکی ایسوسی ایشن کے تحت 20 نومبر سے 4 دسمبر تک کراچی کے اولمپیئن حنیف خان و ڈاکٹر جنید علی شاہ اسپورٹس ہاکی کمپلیکس میں کھیلے جانے والے میئر کراچی گولڈ کپ انٹرڈسٹرکٹ ہاکی لیگ کا فائنل ڈسٹرکٹ سینٹرل اور ڈسٹرکٹ ویسٹ کے درمیان کھیلا گیا۔ پہلے کواٹر کے چھٹے منٹ میں ڈسٹرکٹ ویسٹ کے ارباز نے گول کر کے اپنی ٹیم کو ایک گول کی سبقت دلوادی ، دوسرے کوارٹر میں ڈسٹرکٹ ویسٹ نے جوابی حملے میں کھیل کے17 ویں منٹ میں زوہیب خان نے گول اسکور کرکے مقابلہ ایک ایک گول سے برابر کردیا۔ وقفے میں مقابلہ ایک ایک گول سے برابر تھا۔ تیسرے کوارٹر میں دونوں ٹیموں نے شاندار کھیل پیش کیا، ڈسٹرکٹ ویسٹ کے دفاعی کھلاڑی علی کی غلطی سے ڈسٹرکٹ سینٹرل کو45 ویں منٹ میں ایک پنالٹی کارنر ملا جس پر حیدر حسین نے شاندار گول اسکور کرکے اپنی ٹیم کومیچ میں2-1 سے سبقت دلوادی۔ چوتھے اور آخری کوارٹر کے اختتام سے پانچ منٹ قبل55 ویں منٹ اور57 ویں منٹ میں شاہ زیب نے مسلسل دو گول بناکر اپنی ٹیم کومیچ میں4-1 سے سرخرو کردیا۔ فائنل کے موقع پر کمپلیکس تماشائیوں سے بھرا ہواتھا۔ شائقین ہاکی کی بہت بڑی تعداد کو دیکھ کر کھلاڑیوں کا جذبہ بھی قابل دید نظر آرہاتھا۔میچ دیکھنے کے لیئے ہاکی اولمپیئن عبدالوحید خان، حنیف خان، احمد عالم،نیشنل بینک شعبہ اسپورٹس کے سربراہ اقبال قاسم، انور فاروقی، زاہد شہاب، ابوذر، عظمت اللہ خان، حسیب خان، انٹرنیشنل ہاکی پلیئر گولڈ میڈلسٹ جمیل احمد،ممبر قومی اسمبلی اقبال محمد علی خان، چیئرمین ڈی ایم سی ایسٹ معید انور، چیئرمین ڈی ایم سی ویسٹ اظہار احمد خان،ناہید باجی،کراچی ہاکی ایسوسی ایشن ویمنز ونگ کی سرپرست ڈاکٹر اسما علی شاہ،سیکریٹری کے ایچ اے ویمنز ونگ بینش علی،چیئر مین کے ایچ اے گلفراز خان، سینئر نائب صدر ڈاکٹر ایس اے ماجد اور کے ایچ اے کونسل ممبر زاہد محمو د ،سہیل نور سمیت دیگر عہدیدار بھی موجود تھے۔