پیپلز پارٹی کے شریک چیئرمین آصف زرداری نے کہا کہ عام انتخابات میں پیپلز پارٹی ملک بھر سے کامیابی حاصل کرے گی اور 
حکومت بنا کر میں خود ڈرائیونگ سیٹ سنبھالوں گا۔ نواب شاہ میں جلسے سے خطاب کرتے ہوئے انہوں نےکہا کہ 2013 کے آر او الیکشن میں ہمیں ایک سازش کے تحت روکا گیا اور انتخابات سے باہر رکھ کر یہ تاثر دیا گیا کہ پنجاب میں پیپلز پارٹی مقبول نہیں، ہمیں اب بھی ڈرایا اور دھمکایا جارہا ہے لیکن ہم ڈرنے والے نہیں، ہم نے مارشل لاء کا مقابلہ کیا، اس مرتبہ ہم پوری تیاری کے ساتھ انتخابی میدان میں اتریں گے، پیپلز پارٹی ملک بھر سے کامیابی حاصل کرکے حکومت بنائے گی اور ڈرائیونگ سیٹ پر میں خود بیٹھوں گا اور دکھاؤں گا کہ ملک کس طرح چلایا جاتا ہے۔ انہوں نے کہا کہ نوازشریف نے ملک کا بیڑہ غرق کر دیا، ادارے خسارے میں جارہے ہیں اور عوام مزید قرض دار ہورہے ہیں، ہم نے ملک کو ترقی و خوشحالی کی راہ پر لے کر جانا ہے اور اقتدار سنبھال کر ملکی خزانے بھرنے ہیں، بلاول 100 فیصد لیڈر بن کر سیاست میں مکمل طور پر آ چکا ہے، آصفہ بھٹو بھی نواب شاہ سے الیکشن میں حصہ لے گی۔