سندھ تھیٹر فیسٹیول پاکستان کا واحد تھیٹر فیسٹیول ہے جسے عوام بغیر کسی ادائیگی کے مفت میں دیکھتے ہیں۔

کراچی ( بی ایل ٰآئی) محکمہ ثقافت سندھ کے تعاون سے آرٹس کونسل آف پاکستان کراچی میں جاری “سندھ تھیٹر فیسٹیول” کی اختتامی تقریب آرٹس کونسل آف پاکستان کراچی میں منعقد ہوئی جس میں سیکرٹری سندھ کلچر اکبر لغاری، ڈرائریکٹر سہیل ملک اورایم پی اے قاسم سومرو سمیت معروف سماجی اور ادبی شخصیات نے شرکت کی۔ تقریب سے خطاب کرتے ہوئے صدر آرٹس کونسل کراچی محمد احمد شاہ نے کہا کہ آرٹس کونسل آف پاکستان میں جاری سندھ تھیٹر فیسٹیول ایک کامیاب فیسٹیول رہا ، پہلے مرحلے میں ہم نے اٹھارہ ڈرامے پیش کرنا تھا لیکن تھیٹر کے لیے تمام پاسز پہلے دور وز میں ہی ختم ہو گئے جس کے بعد سندھ کلچر بورڈ اور ہم نے طے کیا کہ ہر ناٹک کے دو شوز ہوں گے یوں تیسرے سندھ تھیٹر فیسٹیول میں چھتیس شو پیش کیے گئے، اور اس کا کریڈٹ محکمہ ثقافت سندھ کے ساتھ ساتھ وزیر ثقافت سندھ سید سردار علی شاہ کو جاتا ہے ۔ ان کا مزید کہنا تھا کہ آرٹس کونسل آف پاکستان کراچی اس طرح کے ثقافتی پروگرام کرواتا رہے گا سندھ تھیٹر فیسٹیول پاکستان کا واحد تھیٹر فیسٹیول ہے جسے عوام بغیر کسی ادائیگی کے مفت میں دیکھتے ہیں۔ انہوں نے آرٹس کونسل میں ہونے والی گیارہویں عالمی اردو کانفرنس کا بھی اعلان کیا اور کہا کہ یہ دنیا کی سب سے بڑی اردو کانفرنس ہوتی ہے۔ اس موقع پر صدر آرٹس کونسل احمد شاہ نے سیکرٹری کلچرل سندھ غلام اکبر لغاری اور قاسم سومرو کو گلدستہ بھی پیش کیا جبکہ اکبر لغاری نے محکمہ ثقافت سندھ کی جانب سے محمد احمد شاہ اور قاسم سومرو کو اجرک پہنائی۔